ପ୍ରସାଦ ରାଓ
ମାର୍ଚ୍ଚ ୨୯

ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରୀୱାଲଙ୍କ ‘ଆମ୍ ଆଦମୀ ପାର୍ଟି’ (ଆପ୍)ର ଜାତୀୟ ଦଳ ମାନ୍ୟତା ପ୍ରସଙ୍ଗ ସମୀକ୍ଷାରେ ରହିଛି ବୋଲି ଭାରତୀୟ ନିର୍ବାଚନ ଆୟୁକ୍ତର ସିଇସି ରାଜୀବ କୁମାର ଆଜି କହିଛନ୍ତି । କର୍ଣ୍ଣାଟକ ବିଧାନସଭା ନିର୍ବାଚନ ପାଇଁ ତାରିଖ ଘୋଷଣା ଅବସରରେ ସେ ଏହି ସୂଚନା ଦେଇଛନ୍ତି । ୨୦୨୩ କର୍ଣ୍ଣାଟକ ବିଧାନସଭା ନିର୍ବାଚନର ଭୋଟ ମେ’ ୧୦ ତାରିଖରେ ଏବଂ ଭୋଟ ଗଣତି ଓ ଫଳାଫଳ ଘୋଷଣା ୧୩ ତାରିଖରେ ହେବ ବୋଲି ସିଇସି କହିଛନ୍ତି । ସିଇସି ରାଜୀବ କୁମାର କର୍ଣ୍ଣାଟକ ବିଧାନସଭା ନିର୍ବାଚନ ତାରିଖ ଘୋଷଣା ଅବସରରେ ‘ଆପ୍’ର ଜାତୀୟ ଦଳ ମାନ୍ୟତାକୁ ନେଇ ଏହି ସୂଚନା ଦେଇଥିଲେ । ‘ଆପ୍’ ଗତ ବର୍ଷ ହୋଇଥିବା ଗୁଜରାଟ ବିଧାନସଭା ନିର୍ବାଚନରେ ମାତ୍ର ୫ଟି ଆସନରେ ବିଜୟୀ ହୋଇଥିଲେ ମଧ୍ୟ ପାଖାପାଖି ୧୩ ପ୍ରତିଶତ ଭୋଟ ପାଇ ଜାତୀୟ ଦଳ ମାନ୍ୟତା ପାଇବାକୁ ହକଦାର ହୋଇଥିଲା । ପଂଜାବ-ହରିୟାଣା ହାଇକୋର୍ଟର ଜଣେ ଆଇନଜୀବୀ ଭାରତୀୟ ନିର୍ବାଚନ ଆୟୁକ୍ତ ‘ଆପ୍’କୁ ଜାତୀୟ ଦଳ ମାନ୍ୟତା ଦେଉ ବୋଲି ଯୁକ୍ତି ଉପସ୍ଥାପନ କରିବାର ଦିନକ ପରେ ସିଇସି ଏହା ସମୀକ୍ଷାସ୍ତରରେ ରହିଛି ବୋଲି କହିଛନ୍ତି । ୧୦ ବର୍ଷ ତଳେ କେଜରୀୱାଲ ‘ଆପ୍’ର ପ୍ରତିଷ୍ଠା କରିବା ପରେ ଦିଲ୍ଲୀରେ କ୍ଷମତାରେ ଦଳର ସରକାର ରହିଛି । ଗତ ବର୍ଷ ହୋଇଥିବା ପଂଜାବ ବିଧାନସଭା ନିର୍ବାଚନରେ ମଧ୍ୟ ‘ଆପ୍’ ସଂଖ୍ୟାଗରିଷ୍ଠ ଆସନରେ ବିଜୟୀ ହୋଇ ଏହି ପଶ୍ଚିମାଂଚଳ ରାଜ୍ୟରେ କ୍ଷମତା ହାତେଇଛି । ଗତ ବର୍ଷ ନଭେମ୍ବରରେ ହୋଇଥିବା ନୂଆଦିଲ୍ଲୀ ପୌର ନିଗମ ନିର୍ବାଚନରେ ମଧ୍ୟ ‘ଆପ୍’ ୧୫ ବର୍ଷ ଧରି କ୍ଷମତାରେ ଥିବା ବିଜେପିକୁ କ୍ଷମତାଚ୍ୟୁତ କରି ଏମସିଡି ଦଖଲ କରିଛି । ଦେଶର ମୋଟ ୮ଟି ରାଜନୈତିକ ଦଳ ଜାତୀୟ ଦଳ ମାନ୍ୟତା ପାଇଥିବା ବେଳେ ‘ଆପ୍’ ସେଥିରେ ଅନ୍ତର୍ଭୁକ୍ତ ଥିବା ଗୌରବର ବିଷୟ ଭାବେ ବିବେଚନା କରାଯାଉଛି ।

ମୋଅନୁଭବ.କମ୍