ନୂଆଦିଲ୍ଲୀ,୧୧ ନଭେମ୍ବର: ସଂଜୟ ଲୀଳା ବଂଶାଳୀଙ୍କ ନିଦେ୍ର୍ଦଶିତ ବିବଦମାନ ଚଳଚ୍ଚିତ୍ର ‘ପଦ୍ମାବତୀ’ର ରିଲିଜ୍ ଉପରେ ରହିତାଦେଶ ଦେବାକୁ ଶୁକ୍ରବାର ଦିନ ସୁପ୍ରିମ କୋର୍ଟ ମନା କରି ଦେଇଛନ୍ତି । ଏହି ଚଳଚ୍ଚିତ୍ରକୁ ସେନସର୍ ବୋର୍ଡ ସାର୍ଟିଫିକେଟ ମିଳିଲାଣି କି ନାହିଁ ଜାଣିବାକୁ ଚାହିଁ ଥିଲେ ଦେଶର ସର୍ବୋଚ୍ଚ ନ୍ୟାୟାଳୟ । ସୁପ୍ରିମ କୋର୍ଟ ଚଳଚ୍ଚିତ୍ରର ରିଲିଜ ଉପରେ ରହିତାଦେଶ ଦେବାକୁ ମନା କରି ଦେବାରୁ ଆଲହାବାଦ ହାଇକୋର୍ଟ ମଧ୍ୟ ଏହି ଚଳଚ୍ଚିତ୍ରକୁ ନିଷିଦ୍ଧ କରିବାକୁ ହୋଇଥିବା ଏକ ଆବେଦନକୁ ଗ୍ରହଣ କରିବାକୁ ମନା କରି ଦେଇଛନ୍ତି ।

ରଣବୀର ସିଂହ, ସାହୀଦ କପୁର ଓ ଦୀପିକା ପାଦୁକୋଣ ମୁଖ୍ୟ ଭୂମିକାରେ ଥିବା କିମ୍ବଦନ୍ତୀ ଭିତ୍ତିକ ବଲିଉଡ୍ ଚଳଚ୍ଚିତ୍ର ‘ପଦ୍ମାବତୀ’ ଡ଼ିସେମ୍ବର ୧ ତାରିଖରେ ମୁକ୍ତିଲାଭ କରିବାକୁ ଯାଉଛି । ଶୁକ୍ରବାର ସୁପ୍ରିମ କୋର୍ଟ ଦେଇଥିବା ରାୟ ଚଳଚ୍ଚିତ୍ରର ନିର୍ମାତା-ନିଦେ୍ର୍ଦଶକ ବଂଶାଳୀଙ୍କୁ ବଡ ଆଶ୍ୱସ୍ତି ଦେଇଛି । ରାଜସ୍ଥାନର ଜୟପୁରଠାରେ ଏହି ଚଳଚ୍ଚିତ୍ରର ସୁଟିଂ ଚାଲିଥିବା ସମୟରେ ସୁଟିଂ ସେଟ୍ରେ ବ୍ୟାପକ ଭଂଗାରୁଜା କରାଯାଇଥିଲା । କୋହ୍ଲାପୁରରେ ମଧ୍ୟ ଏହାର ସୁଟିଂ ସମୟରେ ହିଂସାର ସୂତ୍ରପାତ ହୋଇଥିଲା । ଚଳଚ୍ଚିତ୍ରରେତ୍ତଚିତ୍୍ତୋର ରାଣୀ ପଦ୍ମାବତୀଙ୍କ ଚରିତ୍ରକୁ ନ୍ୟୁନ ଭାବେ ଉପସ୍ଥାପନ କରାଯାଇଛି ଏବଂ ରାଜପୁତ ମହିଳାଙ୍କ ଅସ୍ମିତାକୁ ନ୍ୟୁନ କରାଯାଇଛି ବୋଲି ଅଭିିଯୋଗ କରାଯାଇ ‘ପଦ୍ମାବତୀ’ର ରିଲିଜ୍ ନିଷିଦ୍ଧ କରାଇବାକୁ କିଛି ଦିନ ହେଲା ଯୋରଦାର ଉଦ୍ୟମ ଚାଲିଛି ।

ଶୁକ୍ରବାର ଦିନ ସୁପ୍ରିମ କୋର୍ଟ ମୁଖ୍ୟ ବିଚାରପତି ଜଷ୍ଟିସ୍ ଦୀପକ ମିଶ୍ରଙ୍କ ନେତୃତ୍ୱରେ ଗଠିତ ଏକ ଖଣ୍ଡପୀଠ ମାମଲାର ଶୁଣାଣୀ କରି ସେନସର୍ ବୋର୍ଡ ଫିଲ୍ମକୁ ଦେଖିଛି କି ନାହିଁ, ସାର୍ଟିଫିକେଟ୍ ଦେଇଛି କି ନାହିଁଁ ପ୍ରଥମେ ଜାଣିବାକୁ ଚାହିଁ ଥିଲେ । ସେନସର୍ ବୋର୍ଡ ଏପର୍ଯ୍ୟନ୍ତ ସାର୍ଟିଫିକେଟ୍ ଦେଇ ନଥିବା ଜାଣିବା ପରେ ଖଣ୍ଡପୀଠ ଚଳଚ୍ଚିତ୍ରର ରିଲିଜ୍ ଉପରେ ସ୍ଥଗିତାଦେଶ ଦେବାକୁ ମନା କରି ଦେଇଥିଲେ । କୋର୍ଟ କହିଲେ ଯେ, ଚଳଚ୍ଚତ୍ରକୁ ସାର୍ଟିଫିକେଟ୍ ଦେବା ସକାଶେ ସିବିଏଫସିର ବିଭିନ୍ନ ନୀୟମାବଳୀ ରହିଛି । ଏହାଛଡା, କିଛି ଆପତ୍ତି ଥିଲେ ଶୁଣାଣୀ ପାଇଁ ଫିଲ୍ମ ସାର୍ଟିଫିକେସନ୍ ଆପିଲେଟ୍ ଅଥରିଟି (ଏଫସିଏଟି) ରହିଛି । ସିଦ୍ଧରାଜସିଂହ ମହାବୀରସିଂହ ଚୂଡାସମା ଓ ଅନ୍ୟ ୧୧ ଜଣ ଆବେଦନକାରୀଙ୍କ ଆଡୁ ଚଳଚ୍ଚିତ୍ରର ରିଲିଜ୍ ଉପରେ ସ୍ଥଗିତାଦେଶ ଜାରି ପାଇଁ ଆବେଦନ ହୋଇଥିଲା ଏବଂ ମୁଖ୍ୟ ବିଚାରପତିଙ୍କ ସହ ଖଣ୍ଡପୀଠରେ ଥିବା ଅନ୍ୟ ବିଚାରପତି ଜଷ୍ଟିସ ଏ.ଏମ. ଖାୱିଲକର ଓ ଡ଼ି.ୱାଇ ଚନ୍ଦ୍ରଚୂଡ଼ ଏହାର ଶୁଣାଣୀ କରିଥିଲେ ।