ପ୍ରସାଦ ରାଓ
ଡ଼ିସେମ୍ବର ୨୩
ଗୁରୁବାର ଦିନ ଓଡ଼ିଶାରୁ ଆଉ ଦୁଇ ଜଣ ‘ଓମିକ୍ରନ୍’ ଆକ୍ରାନ୍ତ ଚିହ୍ନଟ ହେବା ପରେ ରାଜ୍ୟରେ ତିନି ଦିନ ବ୍ୟବଧାନରେ ଆକ୍ରାନ୍ତଙ୍କ ସଂଖ୍ୟା ୪କୁ ବୃଦ୍ଧି ପାଇଛି । ଦୁଇ ଜଣ ବିଦେଶ ଫେରନ୍ତା କୋଭିଡ଼ ପଜେଟିଭ ଥିଲେ । ଇନଷ୍ଟିଚ୍ୟୁଟ ଅଫ୍ ଲାଇଫ ସାଇନ୍ସେସ (ଆଇଏଲଏସ୍)ରେ ସେମାନଙ୍କ ନମୂନାର ଜେନମ୍ ସିକ୍ୱେନ୍ସିଂ କରାଯିବା ପରେ ସେମାନେ କୋଭିଡ଼ର ନୂଆ ପ୍ରଜାତି ‘ଓମିକ୍ରନ୍’ରେ ଆକ୍ରାନ୍ତ ଥିବା ଜଣାପଡିଛି । ଗୁରୁବାର ଚିହ୍ନଟ ହୋଇଥିବା ଦୁଇ ଆକ୍ରାନ୍ତ ଅପ୍ରାପ୍ତ ବୟସ୍କ । ଜଣକର ବୟସ ୧୧ ବର୍ଷ ହୋଇଥିବା ବେଳେ ଅନ୍ୟ ଜଣକର ବୟସ ୧୫ ବର୍ଷ । ଦୁହେଁ ମା’ଙ୍କ ସହ ନାଇଜେରିଆରୁ ଖୋର୍ଦ୍ଧା ଫେରି ଥିଲେ । ବିଦେଶରୁ ଫେରିବା ପରେ ରିଜୋନାଲ ମେଡ଼ିକାଲ ରିସର୍ଚ୍ଚ ସେଂଟର (ଆରଏମଆରସି)ରେ ସେମାନଙ୍କ ସ୍ୱାବ୍ ଟେଷ୍ଟ୍ ଆରଟି ପିସିଆର୍ ମାଧ୍ୟମରେ ହୋଇଥିଲା । ଅପ୍ରାପ୍ତ ବୟସ୍କ ଦ୍ୱୟ କୋଭିଡ଼ ପଜେଟିଭ ବାହାରି ଥିବା ବେଳେ ମା’ଙ୍କ ନମୂନା ନେଗେଟିଭ ଥିଲା । ସାମାନ୍ୟ ଲକ୍ଷଣ ପ୍ରକାଶ ପାଉଥିବା ଦୁଇ ଅପ୍ରାପ୍ତ ବୟସ୍କଙ୍କୁ ସମ୍ କୋଭିଡ଼ ହସ୍ପିଟାଲରେ ଭର୍ତ୍ତି କରାଯାଇ ଚିକିତ୍ସା କରାଯାଉଛି । ଦୁହିଁଙ୍କ ସ୍ୱାସ୍ଥ୍ୟବସ୍ଥା ସ୍ଥିର ଥିବା ସୂଚନା ମିଳିଛି । ବୁଧବାର ଦିନ ଇନଷ୍ଟିଚ୍ୟୁଟ ଅଫ୍ ଲାଇଫ ସାଇନ୍ସେସ (ଆଇଏଲଏସ୍)ରେ ୯ଟି ନମୂନା ପରୀକ୍ଷା କରାଯାଇଥିବା ବେଳେ ସେଥିରୁ ଦୁଇଟି ‘ଓମିକ୍ରନ୍’ ପଜେଟିଭ ବାହାରିଛି । ଏପର୍ଯ୍ୟନ୍ତ ଆଇଏଲଏସ୍ ରେ ୧୬ଟି ନମୂନା ପରୀକ୍ଷା ହୋଇଥିବା ବେଳେ ସେଥିରୁ ୪ଟି ପଜେଟିଭ୍ ରହିଛି । ତେବେ, ଦୁଇ ଜଣ ଅପ୍ରାପ୍ତ ବୟସ୍କ ‘ଓମିକ୍ରନ୍’ରେ ଆକ୍ରାନ୍ତ ହେବା ଚିନ୍ତାର କାରଣ ହୋଇଛି ବୋଲି ଆଇଏଲଏସ୍ ପକ୍ଷରୁ କୁହାଯାଇଛି । ଇତିମଧ୍ୟରେ, ରାଜ୍ୟ ସରକାର ଜିଲ୍ଲାସ୍ତରରେ ଟେଷ୍ଟିଂ ବ୍ୟବସ୍ଥା କରିବାକୁ ନିଷ୍ପତ୍ତି ନେବା ସହ ଜିଲ୍ଲାସ୍ତରରେ ଦୈନିକ ଅନ୍ୟୁନ ୭୦ ହଜାର ନମୂନା ପରୀକ୍ଷଣ ପାଇଁ ଟାର୍ଗେଟ୍ ଦେଇଥିବା ଜଣାପଡିଛି । ସେଥିରୁ ୪୦ ପ୍ରତିଶତ ନମୂନା ଆରଟି ପିସିଆର ମାଧ୍ୟମରେ ହେବ । ଆଜି ସୁଦ୍ଧା ଓଡ଼ିଶା ସମେତ ୧୬ଟି ରାଜ୍ୟରୁ ୨୩୮ ଜଣ ‘ଓମିକ୍ରନ୍’ ଆକ୍ରାନ୍ତ ଚିହ୍ନଟ ହେଲେଣି । ମହାରାଷ୍ଟ୍ରରୁ ସର୍ବାଧିକ ୬୫ ଜଣ ଚିହ୍ନଟ ହୋଇଥିବା ବେଳେ ଦିଲ୍ଲୀରୁ ୬୪ ଜଣ ଚିହ୍ନଟ ହୋଇଛନ୍ତି । ଗତ ୨୪ ଘଂଟା ମଧ୍ୟରେ ଓଡ଼ିଶାର ୧୭ଟି ଜିଲ୍ଲାରୁ ମୋଟ ୧୫୫ ଜଣ ନୂଆ କୋଭିଡ଼ ଆକ୍ରାନ୍ତ ଚିହ୍ନଟ ହେବା ଫଳରେ ରାଜ୍ୟରେ ମୋଟ କୋଭିଡ଼ ଆକ୍ରାନ୍ତ ସଂଖ୍ୟା ୧୦ ଲକ୍ଷ ୫୩ ହଜାର ୫୦୩ ଓ କୋଭିଡ଼ ମୃତ୍ୟୁ ସଂଖ୍ୟା ୮୪୪୮ରେ ପହଂଚିଛି । ଚିହ୍ନଟ ହୋଇଥିବା ନୂଆ କେସ୍ ମଧ୍ୟରୁ ଖୋର୍ଦ୍ଧା ଜିଲ୍ଲାରୁ ସର୍ବାଧିକ ୮୪ଟି ଚିହ୍ନଟ ହୋଇଥିବା ଜଣାପଡିଛି । ସମ୍ବଲପୁର ଜିଲ୍ଲାରୁ ୧୦ ଜଣ ଓ କଟକ ଜିଲ୍ଲାରୁ ୮ ଜଣ ନୂଆ ଆକ୍ରାନ୍ତ ଚିହ୍ନଟ ହୋଇଛନ୍ତି । ରାଜ୍ୟରେ ସକ୍ରୀୟ କୋଭିଡ଼ କେସ୍ ସଂଖ୍ୟା ୧୭୮୪ ରହିଛି ।

ମୋଅନୁଭବ.କମ୍