ଚଣ୍ଡିଗଡ଼
ଡ଼ିସେମ୍ବର ୨୭

୨୦୨୨ ପ୍ରାରମ୍ଭରେ ପଂଜାବରେ ବିଧାନସଭା ନିର୍ବାଚନ ହେବାକୁ ଥିବା ବେଳେ ତାହା ପୂର୍ବରୁ ଶୁକ୍ରବାର ଅନୁଷ୍ଠିତ ପଂଜାବ, ହରିୟାନା ରାଜଧାନୀ ଚଣ୍ଡିଗଡ଼ର ପୌର ନିର୍ବାଚନରେ ‘ଆମ୍ ଆଦମୀ ପାର୍ଟି’ (ଆପ୍)ର ବିଜୟ ଦଳ ପାଇଁ ଉତ୍ସାହପ୍ରଦ ହୋଇଛି । ଚଣ୍ଡିଗଡ଼ ସହରାଂଚଳ ନିର୍ବାଚନରେ ‘ଆପ୍’ ପୌରପାଳିକାର ୩୫ରୁ ୧୪ ଆସନରେ ବିଜୟୀ ହୋଇଥିବା ବେଳେ ବିଜେପି ତାହା ପଛକୁ ରହିଛି । ପୌରପାଳିକା ନିର୍ବାଚନରେ ବିଜେପିକୁ ୧୨ଟି, କଂଗ୍ରେସକୁ ୮ଟି ଏବଂ ଅକାଳୀ ଦଳକୁ ଗୋଟିଏ ମାତ୍ର ଆସନ ମିଳିଛି । ପୌର ନିର୍ବାଚନ ଫଳାଫଳ ଆଜି ପ୍ରକାଶ ପାଇଛି । ଚଣ୍ଡିଗଡ଼ ପୌର ନିର୍ବାଚନ ଫଳାଫଳ ପଂଜାବବାସୀଙ୍କ ‘ମୁଡ୍’ କୁ ପ୍ରତିଫଳିତ କରୁଥିବାରୁ ‘ଆପ୍’ର ବିଜୟ ମାତ୍ର ଏକ ଝଲକ ମାତ୍ର, ସଂପୂର୍ଣ୍ଣ ସିନେମା ପଂଜାବ ବିଧାନସଭା ନିର୍ବାଚନରେ ଦେଖିବାକୁ ମିଳିବ ବୋଲି ‘ଆପ୍’ ନେତୃତ୍ୱ ପ୍ରତିକ୍ରିୟା ବ୍ୟକ୍ତ କରିଛନ୍ତି । ଦଳର ଜାତୀୟ ମୁଖପାତ୍ର ରାଘବ ଚଢ୍ଢା କହିଛନ୍ତି, ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରୀୱାଲଙ୍କ ନେତୃତ୍ୱ ଉପରେ ପଂଜାବବାସୀ ଆସ୍ଥା ପ୍ରକଟ କରିଥିବା ଚଣ୍ଡିଗଡ଼ ପୌର ନିର୍ବାଚନ ଫଳାଫଳରୁ ସୂଚିତ ହେଉଛି । ‘ଆମ୍ ଆଦମୀ ପାର୍ଟି’ ଚଣ୍ଡିଗଡ଼ ପୌର ନିର୍ବାଚନ ଫଳାଫଳକୁ ନେଇ ଉତ୍ସାହିତ ଥିବାର କାରଣ ହେଉଛି, ଏହି ନିର୍ବାଚନରେ ବିଜେପିର ମେୟର ରବି କାନ୍ତ ଶର୍ମା ଓ ପୂର୍ବତନ ମେୟର ଦବେଶ ମୁଦଗିଲଙ୍କୁ ‘ଆପ୍’ ପ୍ରାର୍ଥୀ ପରାଜିତ କରିଛନ୍ତି । ବିଜେପିକୁ ଏହା ଏକ ବଡ଼ ଝଟକା ଭାବେ ବିଚାର କରାଯାଉଛି । ତେବେ, ପୌର ନିର୍ବାଚନରେ ‘ଆପ୍’ର ନିର୍ବାଚନ ପ୍ରଚାର କମିଟି ମୁଖ୍ୟ ଚନ୍ଦେର ମୁଖୀ ଶର୍ମା ମଧ୍ୟ ପରାଜିତ ହୋଇଥିବା ଜଣାପଡିଛି । ବିଜେପି ସମର୍ଥକମାନେ କେବେହେଲେ ସେମାନଙ୍କ ଅନୁଗତ୍ୟ ବଦଳାଇ ନଥା’ନ୍ତି । ତେଣୁ, ଚୂଡାନ୍ତ ଫଳାଫଳ ଆସିଲେ କେଉଁ ଦଳର ଭୋଟ ‘ଆପ୍’କୁ ସ୍ଥନାନ୍ତରିତ ହୋଇଛି ଜଣାପଡିବ ବୋଲି ବିଜେପିର ଚଣ୍ଡିଗଡ଼ ମୁଖପାତ୍ର ନରେଶ ଆରୋରା କହିଛନ୍ତି । ବିଗତ ପୌର ନିର୍ବାଚନରେ ବିଜେପିକୁ ୨୦ ଆସନ ଓ ତାହାର ସହଯୋଗୀ ଅକାଳୀ ଦଳକୁ ଗୋଟିଏ ଆସନ ମିଳିଥିଲା । ଏହି ମେଂଟର ମୁଖ୍ୟ ପ୍ରତିଦ୍ୱନ୍ଦ୍ୱୀ ଥିଲା କଂଗ୍ରେସ । ଆଇଏନସିକୁ ମାତ୍ର ୪ଟି ଆସନ ମିଳି ଥିଲା । ତିନି କୃଷି ଆଇନ ପ୍ରତ୍ୟାହାର ଦାବିରେ ଆନ୍ଦୋଳନ କରୁଥିବା ଚାଷୀ ସଂଗଠନଙ୍କ ସମର୍ଥନରେ ଅକାଳୀ ଦଳ ଚଳିତ ବର୍ଷ ପ୍ରାରମ୍ଭରେ ବିଜେପିର ହାତ ଛାଡିଥିଲା । ପାଂଚ ବର୍ଷରେ ଥରେ ହେଉଥିବା ଚଣ୍ଡିଗଡ଼ ପୌର ନିର୍ବାଚନରେ ବିଜେପି ଓ କଂଗ୍ରେସ ପାରଂପରିକ ପ୍ରତିଦ୍ୱନ୍ଦ୍ୱୀ ରହୁ ଥିଲେ । ତେବେ, ଡ଼ିସେମ୍ବର ଗତ ୨୪ ତାରିଖ (ଶୁକ୍ରବାର) ଅନୁଷ୍ଠିତ ନିର୍ବାଚନରେ ପ୍ରତିଦ୍ୱନ୍ଦ୍ୱିତା ଚତୁର୍ମୁଖୀ ଥିଲା । କଂଗ୍ରେସ, ବିଜେପି, ଅକାଳୀ ଦଳ-ବିଏସପି ମେଂଟ ଏବଂ ‘ଆପ୍’ ମଧ୍ୟରେ ପ୍ରତିଦ୍ୱନ୍ଦ୍ୱିତା ହୋଇଥିଲା । ଚଣ୍ଡିଗଡ଼ ପୌର ପରିଷଦ ନିର୍ବାଚନ ଫଳାଫଳ ୨୦୨୨ ପଂଜାବ ବିଧାନସଭା ନିର୍ବାଚନରେ ମଧ୍ୟ ପ୍ରତିଫଳିତ ହେବ ବୋଲି ‘ଆମ୍ ଆଦମୀ ପାର୍ଟି’ (ଆପ୍) ଆଶାବାଦୀ ରହିଛି ।

ମୋଅନୁଭବ.କମ୍