ଭୁବନେଶ୍ୱର
ଜାନୁୟାରୀ ୧୧

ଓଡ଼ିଶାରେ ତ୍ରିସ୍ତରୀୟ ପଂଚାୟତ ନିର୍ବାଚନ ପାଇଁ ମତଦାନ ଫେବୃୟାରୀ ୧୬ରୁ ୨୪ ତାରିଖ ପର୍ଯ୍ୟନ୍ତ ପାଂଚ ପର୍ଯ୍ୟାୟରେ ଅନୁଷ୍ଠିତ ହେବ ବୋଲି ରାଜ୍ୟ ନିର୍ବାଚନ କମିସନ୍ (ଏସଇସି) ଆଜି ଘୋଷଣା କରିଛନ୍ତି । ମତଦାତା ଫେବୃୟାରୀ ୧୬, ୧୮,୨୦, ୨୨ ଓ ୨୪ ତାରିଖ ସକାଳ ୭ଟାରୁ ଅପରାହ୍ନ ଗୋଟାଏ ପର୍ଯ୍ୟନ୍ତ ସେମାନଙ୍କ ମତଦାନ କରି ପାରିବେ । ବ୍ଲକ ଓ ସଦର ମହକୁମା ସ୍ତରରେ ୨୬,୨୭ ଓ ୨୮ ତାରିଖ ଭୋଟ ଗଣତି ହେବ । ଏସଇସି ଆଦିତ୍ୟ ପ୍ରସାଦ ପାଢୀ ଆଜି ଏହି ସୂଚନା ଦେବା ସହ ପଂଚାୟତ ନିର୍ବାଚନ ପାଇଁ ଜାନୁୟାରୀ ୧୩ ତାରିଖରେ ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇବ ବୋଲି କହିଛନ୍ତି । ଘୋଷିତ କାର୍ଯ୍ୟକ୍ରମ ଅନୁଯାୟୀ, ନାମାଂକନପତ୍ର ଦାଖଲ, ଯାଂଚ ଓ ପ୍ରତ୍ୟାହାର ସରିବା ପରେ ଜାନୁୟାରୀ ୨୫ରେ ଚୂଡାନ୍ତ ପ୍ରାର୍ଥୀ ତାଲିକା ପ୍ରକାଶ ପାଇବ । ପ୍ରାର୍ଥମାନେ ଯେଉଁ ନାମାଂକନପତ୍ର ଦାଖଲ କରିବେ ସେଥିରେ କୌଣସି ମିଥ୍ୟା ତଥ୍ୟ ନ ଦେବାକୁ ପରାମର୍ଶ ଦେବା ସହ ଯଦି କିଛି ମିଥ୍ୟା ତଥ୍ୟ ଥିବା ପରବର୍ତ୍ତୀ ସମୟରେ ଜଣାପଡିବ ତେବେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ହେବ ବୋଲି ଚେତାବନୀ ଦେଇଛନ୍ତି ।

ରାଜ୍ୟରେ କୋଭିଡ଼ ସଂକ୍ରମଣ ବୃଦ୍ଧି ପାଉଥିବା ଦୃଷ୍ଟିରୁ ଆଗାମୀ ପଂଚାୟତ ନିର୍ବାଚନରେ ଶୋଭାଯାତ୍ରା, ସାଧାରଣ ସଭାକୁ ନିଷିଦ୍ଧ କରାଯାଇଛି । ପ୍ରାର୍ଥୀମାନେ କେବଳ ଡ଼ିଜିଟାଲ୍ ଓ ଭର୍ଚ୍ଚୁଆଲ୍ ମାଧ୍ୟମରେ ନିର୍ବାଚନ ପ୍ରଚାର କରି ପାରିବେ । ପ୍ରାର୍ଥୀମାନେ ଘରକୁ ଘର ବୁଲି ନିର୍ବାଚନ ପ୍ରଚାର କରି ପାରିବେ । ତେବେ, ପ୍ରାର୍ଥୀଙ୍କ ସମେତ ମାତ୍ର ୫ ଜଣଙ୍କୁ ଅନୁମତି ରହିଛି । ସେହିଭଳି, ବିଜୟ ଶୋଭାଯାତ୍ରା ନିଷିଦ୍ଧ କରାଯାଇଛି । କେବଳ ଦୁଇ ଡୋଜ୍ ଟିକା ନେଇଥିବା ଏବଂ କୋଭିଡ଼ ନେଗେଟିଭ୍ ଥିବା ବ୍ୟକ୍ତିଙ୍କୁ ହିଁ ଭୋଟ ଗଣତି କେନ୍ଦ୍ରକୁ ପ୍ରବେଶ ଅନୁମତି ମିଳିବ ବୋଲି ରାଜ୍ୟ ନିର୍ବାଚନ କମିସନ୍ କହିଛନ୍ତି । ତ୍ରିସ୍ତରୀୟ ପଂଚାୟତ ନିର୍ବାଚନରେ ନାଏବ ସରପଂଚ ନିର୍ବାଚନ ମାର୍ଚ୍ଚ ୧୧ରେ, ପଂଚାୟତ ସମିତି ଅଧ୍ୟକ୍ଷ ନିର୍ବାଚନ ମାର୍ଚ୍ଚ ୧୨ ଓ ଜିଲ୍ଲା ପରିଷଦ ଅଧ୍ୟକ୍ଷ ନିର୍ବାଚନ ମାର୍ଚ୍ଚ ୧୩ରେ ଅନୁଷ୍ଠିତ ହେବ । ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ୧୦ ତାରିଖ ସର୍ବଦଳୀୟ ବୈଠକ କରି ପଂଚାୟତ ନିର୍ବାଚନ ସଂପର୍କରେ ଆଲୋଚନା କରିବା ପରେ ଆଜି ନିର୍ବାଚନ ତାରିଖ ଘୋଷଣା କରିଛନ୍ତି ।

ନିର୍ବାଚନ ତାରିଖ ଘୋଷଣା ସହ ରାଜନୈତିକ ଦଳ ଓ ପ୍ରାର୍ଥୀଙ୍କ ପାଇଁ ଆଦର୍ଶ ଆଚରଣ ବିଧି ଲାଗୁ ହୋଇଛି, ଯାହାକି ନିର୍ବାଚନ ସରିବା ପର୍ଯ୍ୟନ୍ତ ଲାଗୁ ରହିବ । ରାଜ୍ୟର ୩୦ ଜିଲ୍ଲାରୁ ୨୯ ଜିଲ୍ଲାର ୬,୭୯୪ ଗ୍ରାମ ପଂଚାୟତ ଅନ୍ତର୍ଗତ ୯୧,୯୧୩ଟି ୱାର୍ଡରେ ପଂଚାୟତ ଭୋଟ ହେବ । ୨୦୧୭ରେ ୬,୮୦୧ ଜିପିରେ ପଂଚାୟତ ନିର୍ବାଚନ ହୋଇଥିଲା । ଇତିମଧ୍ୟରେ ସାତଟି ଗ୍ରାମ ପଂଚାୟତ ଏନଏସିରେ ସାମିଲ ହୋଇ ଥିବାରୁ ସେସବୁ ଜିପି ପଂଚାୟତ ନିର୍ବାଚନରୁ ବାଦ୍ ପଡିଛନ୍ତି । ବାଦ୍ ପଡିଥିବା ସାତଟି ଜିପି ମଧ୍ୟରେ ବାଲେଶ୍ୱର ଜିଲ୍ଲା ରେମୁଣାର ୪ଟି ଜିପି ଥିବା ବେଳେ ନୟାଗଡ଼ ଜିଲ୍ଲା ଓଡ଼ଗାଁର ଦୁଇଟି ଜିପି ଓ ବରଗଡ଼ ଜିଲ୍ଲା ବିଜେପୁରର ଗୋଟିଏ ଜିପି ରହିଛି । କୋଭିଡ଼ ପରିସ୍ଥିତି ଦୃଷ୍ଟିରୁ ରାଜ୍ୟରେ ପଂଚାୟତ ନିର୍ବାଚନ ତିନି ମାସ ଘୁଂଚାଇ ଦିଆଯିବାକୁ ବିରୋଧୀ ବିଜେପି ଓ କଂଗ୍ରେସ ପକ୍ଷରୁ ରାଜ୍ୟ ନିର୍ବାଚନ କମିସନଙ୍କ ନିକଟରେ ଦାବି କରାଯିବା ସତ୍ତ୍ୱେ ଆଜି ପଂଚାୟତ ନିର୍ବାଚନ ତାରିଖ ଘୋଷଣା ହୋଇଛି ।

ମୋଅନୁଭବ.କମ୍