ପ୍ରସାଦ ରାଓ
ମାର୍ଚ୍ଚ ୧୬

‘ଆପ୍’ ବିଧାୟକ ଦଳ ନେତା ଭଗୱନ୍ତ ମାନ୍ ଆଜି ପଂଜାବ ମୁଖ୍ୟମନ୍ତ୍ରୀ ଭାବେ ସ୍ୱାଧୀନତା ସଂଗ୍ରାମୀ ସହୀଦ ଭଗତ ସିଂହଙ୍କ ଜନ୍ମମାଟି ‘ଖଟକର କାଲାନ’ ଗ୍ରାମରେ ଶପଥ ଗ୍ରହଣ କରିଛନ୍ତି । ଏକ ବିସ୍ତୃତ ଚାଷୀ ଜମିରେ ଆୟୋଜିତ ଏହି ଶପଥ ଗ୍ରହଣ ଉତ୍ସବରେ ଦିଲ୍ଲୀ ମୁଖ୍ୟମନ୍ତ୍ରୀ ତଥା ‘ଆପ୍’ର ଜାତୀୟ ଆବାହକ ଅରବିନ୍ଦ କେଜାରୱାଲଙ୍କ ସମେତ ଦଳର ବହୁ ବରିଷ୍ଠ ନେତାମାନେ ଯୋଗ ଦେଇଥିଲେ । ଭଗୱନ୍ତ ମାନ୍ ମୁଖ୍ୟମନ୍ତ୍ରୀ ଭାବେ ଶପଥ ନେଇ ତାଙ୍କ ପ୍ରଥମ ଭାଷଣରେ କହିଛନ୍ତି, ପଂଜାବକୁ ଏକ ପ୍ରଗତିଶୀଳ ରାଜ୍ୟରେ ପରିଣତ କରିବା ଦିଗରେ ସେ କାର୍ଯ୍ୟ କରିବେ । ପଂଜାବ ଆଉ ‘ଉଡ଼ତା ପଂଜାବ’ ନୁହେଁ, ‘ବଢତା ପଂଜାବ’ ଭାବେ ଦେଶରେ ପରିଚିତ ହେବ ବୋଲି ସେ ଘୋଷଣା କରିଛନ୍ତି । ମାନ୍ ମୁଖ୍ୟମନ୍ତ୍ରୀ ଭାବେ ଶପଥ ନେବା ପୂର୍ବରୁ ‘ଆପ୍’ ବିଧାୟକ ଦଳ ବୈଠକରେ ଉଦବୋଧନ ଦେଇ ଦଳକୁ ଯେଉଁମାନେ ଭୋଟ ଦେଇଛନ୍ତି ଓ ଯେଉଁମାନେ ଦେଇ ନାହାନ୍ତି ସମସ୍ତଙ୍କୁ ସମାନ ଦୃଷ୍ଟିରେ ଦେଖିବାକୁ ଓ କାହାରି ପ୍ରତି ଆକ୍ରୋଶ ନ ରଖିବାକୁ ସହଯୋଗୀ ବିଧାୟକମାନଙ୍କୁ ଆହ୍ୱାନ ଦେଇଥିଲେ । ୪୮ ବର୍ଷ ବୟସ୍କ ମାନ୍ ହେଉଛନ୍ତି ରାଜ୍ୟର କନିଷ୍ଠତମ ମୁଖ୍ୟମନ୍ତ୍ରୀ । ବିଧାୟକ ଦଳ ନେତା ହେବା ପରେ ସେ ଗତକାଲି ସାଂସଦ ପଦରୁ ଇସ୍ତଫା ଦେଇଛନ୍ତି । ସହୀଦ ଭଗତ ସିଂହଙ୍କ ପ୍ରତି ତାଙ୍କ ହୃଦୟରେ ସ୍ୱତନ୍ତ୍ର ସ୍ଥାନ ରହିଛି । ତେଣୁ, ସେ ମୁଖ୍ୟମନ୍ତ୍ରୀ ଭାବେ ଶପଥ ନେବାକୁ ରାଜଭବନ କିମ୍ବା କୌଣସି ବଡ଼ କ୍ରିକେଟ ପଡିଆକୁ ନ ବାଛି ଭଗତ ସିଂହଙ୍କ ଗ୍ରାମ ‘ଖଟକର କାଲାନ’କୁ ବାଛିଲେ ବୋଲି ହଳଦି ବସନ୍ତ ରଂଗର ପଗଡି ପରିଧାନ କରିଥିବା ମାନ୍ କହିଛନ୍ତି । ନିକଟରେ ପଂଜାବରେ ସରି ଥିବା ବିଧାନସଭା ନିର୍ବାଚନରେ ଭଗୱନ୍ତ ମାନ୍ ଙ୍କ ନେତୃତ୍ୱରେ ଦଳ (ଆମ୍ ଆଦମୀ ପାର୍ଟି) ୧୧୭ ବିଧାନସଭା ଆସନରୁ ୯୨ଟିରେ ବିଜୟ ହାସଲ କରିଛି । ଦଳ କ୍ଷମତାକୁ ଆସିଲେ ମାନ୍ ମୁଖ୍ୟମନ୍ତ୍ରୀ ହେବେ ବୋଲି ‘ଆପ୍’ ଜାତୀୟ ଆବାହକ କେଜରୀୱାଲ ନିର୍ବାଚନ ସମୟରୁ ଘୋଷଣା କରି ସାରିଥିଲେ । ଆଜି ତାହା ବାସ୍ତବ ରୂପ ନେଇଛି । ଦିଲ୍ଲୀରେ ଯେଭଳି ମୋହଲ୍ଲା କ୍ଲିନିକ ଚାଲିଛି ଓ ସରକାରୀ ସ୍କୁଲ ସବୁର ରୂପାନ୍ତରିତ ହୋଇଛି ପଂଜାବରେ ମଧ୍ୟ ସେଭଳି ହେବ । ତାଙ୍କ ସରକାର କୃଷିର ବିକାଶ ସହ ବେକାରୀ ଦୂର କରିବା ଦିଗରେ କାର୍ଯ୍ୟ କରିବେ ବୋଲି ମାନ୍ ଘୋଷଣା କରିଛନ୍ତି । ତାଙ୍କ ସରକାରର କାର୍ଯ୍ୟ ସାମାନ୍ୟ ମନ୍ଥର ରହିଲେ ସାମାଜିକ ଗଣମାଧ୍ୟମ ତାହାର ସମାଲୋଚନା ନ କରି ସହଯୋଗ କରିବାକୁ ମଧ୍ୟ ସେ ନିବେଦନ କରିଛନ୍ତି ।

ମୋଅନୁଭବ.କମ୍