ଚଣ୍ଡିଗଡ଼
ମଇ ୦୫

ଆଜି ଭୋର ୪ଟା ସମୟରେ ପୁଲୁସ ହରିଆନାର ଏକ ଟୋଲ ପ୍ଲାଜା ନିକଟରୁ ଚାରି ଜଣ ସନ୍ଦିଗ୍ଧ ଖାଲିସ୍ତାନୀ ଆତଙ୍କବାଦୀଙ୍କୁ ଗିରଫ କରିବା ସହ ସେମାନଙ୍କ ନିକଟରୁ ବିପୁଳ ପରିମାଣର ମାରଣାସ୍ତ୍ର ଓ ବିଷ୍ଫୋରକ ଭର୍ତ୍ତି କଂଟେନର୍ ଜବତ କରିଛନ୍ତି । ସଂପୃକ୍ତ ସନ୍ଦିଗ୍ଧ ଆତଙ୍କବାଦୀମାନେ ମାରଣାସ୍ତ୍ର ଓ ବିଷ୍ଫୋରକ ଧରି ମହାରାଷ୍ଟ୍ରର ନାନେ୍ଦଦ ଓ ତେଲେଂଗାନାର ଆଦିଲାବାଦ ଅଭିମୁଖେ ଯାଉଥିବା ବେଳେ କର୍ଣ୍ଣଲର ବସ୍ତାରା ଟୋଲ୍ ପ୍ଲାଜା ନିକଟରେ ଧରା ପଡିଥିବା ପୁଲିସ କହିଛନ୍ତି । ମୁଖ୍ୟ ଅଭିଯୁକ୍ତ ଗୁରୁପ୍ରିତ ଜେଲରେ ଥିବା ସମୟରେ ରାଜବୀର ନାମକ ଜଣେ ଆତଙ୍କବାଦୀର ସଂସ୍ପର୍ଶରେ ଆସି ଥିଲା, ଯାହାର କି ପାକିସ୍ତାନୀ ଗୁଇନ୍ଦା ସଂସ୍ଥା ଆଇଏସଆଇ ସହ ସଂପୃକ୍ତି ରହିଛି । ଗୁରୁପ୍ରିତ ଓ ଅନ୍ୟ ତିନି ଜଣ ସନ୍ଦିଗ୍ଧ ଆତଙ୍କବାଦୀ ଏକ ଧଳା ଟୟୋଟା ଇନୋଭା ଏସୟୁଭି ଗାଡ଼ିରେ ମାରଣାସ୍ତ୍ର ଓ ବିଷ୍ଫୋରକ ଧରି ଦିଲ୍ଲୀ ଅଭିମୁଖେ ଯିିବା ସମୟରେ କର୍ଣ୍ଣଲର ବସ୍ତାରା ଟୋଲ୍ ପ୍ଲାଜା ନିକଟରେ ସେମାନଙ୍କୁ ଗିରଫ କରାଯାଇଛି । ଗୁରୁପ୍ରିତ ସହ ଗିରଫ ହୋଇଥିବା ଅନ୍ୟ ତିନି ହେଉଛନ୍ତି – ଭୂପିନ୍ଦର, ଅମନଦୀପ ଓ ପରମିନ୍ଦର । ସମସ୍ତେ ପଂଜାବ ଅଧିବାସୀ ଏବଂ ଆଇଏସଆଇ ସହ ସେମାନଙ୍କ ସଂପର୍କ ରହିଛି ବୋଲି ପୁଲିସ କହିଛି । ପୁଲିସ କହିବା ଅନୁଯାୟୀ, ପାକିସ୍ତାନରୁ ହରବିନ୍ଦର ସିଂହ ନାମକ ଜଣେ ଆତଙ୍କବାଦୀ ସେମାନଙ୍କୁ ଏହି କାର୍ଯ୍ୟରେ ନିୟୋଜିତ କରିବା ସହ ନିରେଦେଶ ଦେଉଥିଲେ । ସେହି ନିର୍ଦେଶକୁ ମାନି ଅଭିଯୁକ୍ତମାନେ ଦେଶର ବିଭିନ୍ନ ଅଂଚଳରେ ମାରଣାସ୍ତ୍ର ଓ ବିଷ୍ଫୋରକ ପହଂଚାଉ ଥିଲେ । ବିଭିନ୍ନ ସ୍ଥାନରେ ବିଷ୍ଫୋରଣ ଘଟାଇ ଆତଙ୍କର ବାତାବରଣ ସୃଷ୍ଟି କରିବା ଉଦ୍ଦେଶରେ ସେମାନଙ୍କ ମାଧ୍ୟମରେ ଆଇଇଡ଼ି (ଇଂପ୍ରୋଭାଇଜଡ଼ ଏକ୍ସପ୍ଲୋସିଭ ଡ଼ିଭାଇସ୍) ମଧ୍ୟ ପଠା ଯାଉଥିଲା । ସନ୍ଦିଗ୍ଧ ଆତଙ୍କବାଦୀ ଦୁଇଟି ସ୍ଥାନରେ ଆଇଇଡ଼ି ପହଂଚାଇବାରେ ସଫଳ ମଧ୍ୟ ହୋଇଛନ୍ତି । ତେବେ, ଆଜି ଭୋରରେ ଦିଲ୍ଲୀ ଆଡକୁ ଯିବା ସମୟରେ ଧରା ପଡିଛନ୍ତି । ପୁଲିସ ଚାରି ସନ୍ଦିଗ୍ଧ ଆତଙ୍କବାଦୀଙ୍କ ନିକଟରୁ ଗୋଟିଏ ଦେଶୀ ପିସ୍ତଲ, ୩୧ଟି ଗୁଳି, ଚାରିଟି ଲୁହା କଂଟେନରରେ ଭର୍ତ୍ତି ବିଷ୍ଫୋରକ (ଆଇଇଡ଼ି) ଏବଂ ୧.୩୦ ଲକ୍ଷ ଟଙ୍କା ଜବତ କରିଛି । ସଂପୃକ୍ତ ସନ୍ଦିଗ୍ଧ ଆତଙ୍କବାଦୀମାନେ ମୁଖ୍ୟତଃ କୁରିୟର ଭାବେ କାର୍ଯ୍ୟ କରନ୍ତି । ଗୋଟିଏ ଇନୋଭା ଗାଡିରେ ବେଆଇନ ଅସ୍ତ୍ରଶସ୍ତ୍ର ଓ ବିଷ୍ଫୋରକ ଧରି ତେଲେଂଗାନାର ଆଦିଲାବାଦ ଅଭିମୁଖେ ଯାଉଥିବା ବେଳେ ହରିୟାନାର କର୍ଣ୍ଣଲ ନିକଟରେ ଧରା ପଡିଛନ୍ତି ବୋଲି ପ୍ରାଥମିକ ତଦନ୍ତ ପରେ କର୍ଣ୍ଣଲ ରେଂଜ୍ ପୁଲିସ ଆଇଜି ସତେନ୍ଦ୍ର କୁମାର ଗୁପ୍ତା ଏକ ସମ୍ବାଦ ସରବରାହ ସଂସ୍ଥାକୁ ସୂଚନା ଦେଇଛନ୍ତି । ଅଭିଯୁକ୍ତମାନଙ୍କୁ କୋର୍ଟରେ ହାଜର କରାଯାଇ ରିମାଣ୍ଡରେ ଅଣାଯିବା ପରେ ବିସ୍ତୁତ ଭାବେ ଜେରା କରାଯିବ ବୋଲି ଗୁପ୍ତା କହିଛନ୍ତି । ଜବତ ତିନି ଲୁହା କଂଟେନରରେ ମାରାତ୍ମକ ବିଷ୍ଫୋରକ ଆରଡ଼ିଏକ୍ସ ଭରପୁର ଥିବା ପୁଲିସ ଅନୁମାନ କରି ବିଷ୍ଫୋରକ ବିଶେଷଜ୍ଞ ଦ୍ୱାରା ଯାଂଚ ଚଳାଇଛି ।

ମୋଅନୁଭବ.କମ୍