ପ୍ରସାଦ ରାଓ
ଭୁବନେଶ୍ୱର
ଅକ୍ଟୋବର ୩୧

ଝାଡଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ଶ୍ରୀ ରଘୁବର ଦାସ ଆଜି ପୂର୍ବାହ୍ନରେ ରାଜଭବନରେ ଆୟୋଜିତ ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ଓଡ଼ିଶାର ୨୬ତମ ରାଜ୍ୟପାଳ ଭାବେ ଶପଥ ଗ୍ରହଣ କରିଛନ୍ତି । ଓଡ଼ିଶା ହାଇକୋର୍ଟର ମୁଖ୍ୟ ବିଚାରପତି ଜଷ୍ଟିସ ଡ.ବିଦ୍ୟୁତ ରଂଜନ ଷଡଙ୍ଗୀ ଶ୍ରୀ ଦାସଙ୍କୁ ନୂତନ ରାଜ୍ୟପାଳ ଭାବେ ଶପଥ ପାଠ କରାଇଥିଲେ । ଆୟୋଜିତ ଶପଥ ପାଠ ଉତ୍ସବରେ ନୂତନ ରାଜ୍ୟପାଳଙ୍କ ପରିବାର ୮୦ ଜଣ ସଦସ୍ୟ ଆମନ୍ତ୍ରିତ ହୋଇଥିଲେ । ପ୍ରଫେସର ଗଣେଣୀ ଲାଲ ଓଡ଼ିଶାର ରାଜ୍ୟପାଳ ପଦରୁ ଆନୁଷ୍ଠାନିକ ଭାବେ ଅବସର ନେବା ପରେ ତାଙ୍କ ସ୍ଥାନରେ ଶ୍ରୀ ଦାସଙ୍କୁ ରାଜ୍ୟପାଳ ଭାବେ ନିଯୁକ୍ତ କରାଯାଇଛି । ରାଷ୍ଟ୍ରପତି ମହାମହୀମ ଦ୍ରୌପଦୀ ମୁର୍ମୁ ଗତ ୧୮ ତାରିଖ ଦିନ ଶ୍ରୀ ଦାସଙ୍କୁ ଓଡ଼ିଶାର ରାଜ୍ୟପାଳ ଭାବେ ନିଯୁକ୍ତି ଦେଇଥିଲେ । ନୂତନ ରାଜ୍ୟପାଳ ଆଜି ଶପଥ ଗ୍ରହଣ କରିବା ପୂର୍ବରୁ ସକାଳେ ସପରିବାର ଲିଙ୍ଗରାଜ ମନ୍ଦିର ଯାଇ ଶ୍ରୀଲିଙ୍ଗରାଜଙ୍କ ଦର୍ଶନ କରିବା ସହ ମନ୍ଦିରରେ ପୂଜାର୍ଚ୍ଚନା କରିଥିଲେ । ଶ୍ରୀ ଦାସ ରାଜ୍ୟପାଳ ଭାବେ ଶପଥ ନେବା ସକାଶେ ଓଡ଼ିଶା ଆସି ପ୍ରଥମେ ସୋମବାର ଦିନ ସିଧାସଳଖ ପୁରୀରେ ପହଂଚି ଥିଲେ ଏବଂ ସପରିବାର ଶ୍ରୀମନ୍ଦିରକୁ ଯାଇ ଶ୍ରୀଜୀଉଙ୍କ ଦର୍ଶନ କରିବା ସହ ପୂଜାର୍ଚ୍ଚନା କରିଥିଲେ । ପ୍ରଭୁ ଶ୍ରୀଜଗନ୍ନାଥ ଓଡ଼ିଶାବାସୀଙ୍କ ସେବା କରିବା ସକାଶେ ତାଙ୍କୁ ଏଠାକୁ ଆଣିଛନ୍ତି । ସେ ରାଜ୍ୟସରକାରଙ୍କ ସହ ସମନ୍ୱୟ ରକ୍ଷା କରି କାର୍ଯ୍ୟ କରିବେ । ସେ ରାଜ୍ୟପାଳ ଥିବା ପର୍ଯ୍ୟନ୍ତ ଓଡ଼ିଶାବାସୀଙ୍କ ପାଇଁ ରାଜଭବନର ଦୁଆର ସର୍ବଦା ସବୁ ସମୟରେ ଖୋଲା ରହିବ ବୋଲି ନୂତନ ରାଜ୍ୟପାଳ କହିଛନ୍ତି ।

ମୋଅନୁଭବ.କମ୍